• Home  
  • Phumzile Mlambo-Ngcuka: South Africa mourn death of first female deputy president wey die afta medical complications
Phumzile Mlambo-Ngcuka: South Africa mourn death of first female deputy president wey die afta medical complications
- Africa

Phumzile Mlambo-Ngcuka: South Africa mourn death of first female deputy president wey die afta medical complications

Wia dis foto come from, Sharon Seretlo/Gallo Images via Getty Images Wetin we call dis foto, Phumzile Mlambo-Ngcuka for di G20 Social Summit: Opening Ceremony for Birchwood Hotel and OR Tambo Conference Centre on November 18, 2025 for Boksburg, South Africa. Published 21 November 2026, 11:22 WAT Read am in 6 mins Tributes don dey

Wetin we call dis foto, Phumzile Mlambo-Ngcuka for di G20 Social Summit: Opening Ceremony for Birchwood Hotel and OR Tambo Conference Centre on November 18, 2025 for Boksburg, South Africa.

Published

Read am in 6 mins

Tributes don dey pour in for South Africa first female deputy president, Phumzile Mlambo-Ngcuka, wey also serve UN under-secretary-general and Executive Director of UN Women, die at di age of 71.

Tok-tok pesin for di family, Sipho Ngwema wey announce her death for statement on Saturday, 21 November tok say di matriarch pass away on Friday evening, 20 November, afta complications from one medical procedure.

“Di Ngcuka and Mlambo family dey heartbroken by di passing of dia matriarch Phumzile Mlambo-Ngcuka, former Deputy President of South Africa and former United Nations Under-Secretary-General and Executive Director of UN Women.

“She pass away for di evening of Friday, 20 November 2026, following complications from one medical procedure she bin do about two weeks ago,” di statement read.

Di family describe her as a “giant for South African public life and a global citizen.”

“She start as a teacher, bicom di first woman to serve as Deputy President of South Africa, and went on to serve as United Nations Under-Secretary-General and Executive Director of UN Women. She use dos offices to widen opportunities for girls and women. Her family love her dearly, and dem go miss her deeply,” di statement add.

Di family say dem go announce details of di memorial and funeral services afta dem finalise arrangement in consultation wit di presidency.

Skip X post

Allow X content?

Dis article contain content wey X provide. We ask for una permission before anytin dey loaded, as dem fit dey use cookies and oda technologies. You fit wan read di X cookie policy and privacy policy before accepting. To view dis content choose ‘accept and continue’.

Warning: Di BBC no dey responsible for di content of external sites.

End of X post

Presidency, UN, leaders across Africa mourn Phumzile Mlambo Ngcuka

President Cyril Ramaphosa don pay tribute to di former Deputy President Phumzile Mlambo-Ngcuka, as e say na sad moment for di southern African kontri.

Di South African leader remember her as a patriot and a dedicated champion of women’s rights and empowerment.

Ramaphosa recognise her contribution to advancing di rights of women for South Africa, across Africa and globally, wey include through her leadership of di United Nations’ efforts to promote gender equality.

“Dis na very sad moment for us as South Africans to lose a former Deputy President of our kontri, one woman Deputy President, wey serve our kontri very diligently and lead light for di cause of women. Our hearts dey sad and broken at di loss of dat kain dynamic woman leader,” President Ramaphosa tok.

Di Acting President express im condolence to di Mlambo-Ngcuka family on behalf of President Cyril Ramaphosa, di govment and di pipo of South Africa.

E say dem go communicate further details afta due consultation wit di family.

“Acting President Paul Mashatile dis evening learned wit shock and sadness of di passing of former Deputy President of di Republic of South Africa, and former UN Under-Secretary-General and Executive Director of UN Women, Ms Phumzile Mlambo Ngcuka,” di statement read.

South Africa Parliament for statement say Dr Mlambo-Ngcuka dey among di first generation of Members of Parliament to serve for South Africa democratic Parliament, wia she chair di Portfolio Committee on Public Service and Administration.

Namibia President Netumbo Nandi-Ndaitwah for statement tok say Namibia don lost a dear friend, a sister and a distinguished daughter of Africa.

Di presidency describe her as a “formidable Pan-Africanist, an accomplished leader and ogbonge champion of gender equality, women’s empowerment and di advancement of women in all spheres of decision-making.”

“Dr. Mlambo-Ngcuka life and distinguished public service stand as a testament to di transformative power of courageous leadership. She break barriers, challenge entrenched conventions and open doors for generations of women, for time wen di advancement of women leadership neither dey fashionable nor universally embraced,” di statement add.

Chairperson of di African Union Commission, H.E. Mahmoud Ali for statement pay tribute to ogbonge African leader wey her dedication to public service, social justice plus di advancement of women don leave enduring legacy and go continue to inspire future generations.

“As South Africa first woman Deputy President, H.E. Mlambo-Ngcuka bin help pave di way for greater representation of women in political leadership. Her subsequent tenure as Executive Director of UN Women (2013–2021) dey marked by sustained advocacy for gender equality and di meaningful participation of women in peace negotiations, decision-making and post-conflict recovery,” Ali tok for statement.

Di United Nations, South Africa community, national leaders, heads of institutions, also pay tribute to di global icon for statement.

Profile: Ms Phumzile Mlambo Ngcuka

Ms Phumzile Mlambo-Ngcuka serve as Deputy President of di Republic of South Africa from 22 June 2005 to 2008.

Bifor her appointment, she serve as Deputy Minister of Trade and Industry (DTI) of di Republic of South Africa from 1996 to 1999; Minister of Arts, Culture, Science and Technology from 3 February to 30 April 2004; Minister of Minerals and Energy of di Republic of South Africa from 17 June 1999 to 21 June 2005.

She bicom Member of Parliament and Chairperson of di Public Service and Administration Portfolio Committee for 1994.

Ms Mlambo-Ngcuka get Master’s of Philosophy degree in Educational Planning and Policy 2003; Bachelor of Arts degree in Social Science and Education from National University of Lesotho (NUL) 1980 and she study Gender Policy and Planning Development for Planning Unit of di University College of London for 1988.

She devote her career to issues of human rights, equality and social justice. Ms. Mlambo-Ngcuka bin work for govment and civil society, plus di private sector, and she bin dey actively involved in di struggle to end apartheid for her home kontri, South Africa.

Ms Mlambo-Ngcuka lecture for di Impumalanga Teachers Training College, from 1980 to 1981.

She bin serve as Director of World University Services – one funding agency from 1990 until 1992 and she befounder and Managing Director of Phumelela Services, one Management Consulting Company.

She be founding member of di Guguletu Community Development Corporation (GCDC).

For 1997, she bicom member of di National Executive Committee of di African National Congress she serve as a Board member of World Development Foundation.

She bicom Chancellor of Tshwane University of Technology on 2 November 2007.

For di United Nations, Phumzile Mlambo-Ngcuka bin serve as UN Under-Secretary-General and Executive Director of UN Women.

Dem swear her into office on 19 August 2013 and she bring wealth of experience and expertise come di position.

From 2005 to 2008, she serve as Deputy President of South Africa, wey dey oversee programmes to tackle poverty and bring di advantages of a growing economy to di poor, wit particular focus on women.

Ms. Mlambo-Ngcuka wey start her career as teacher gain international experience as coordinator for di World YWCA forn Geneva, wia she bin establish one global programme for young women.

She be di founder of di Umlambo Foundation, wey dey support leadership and education.

She be longtime champion of women rights, wey dey affiliated wit several organizations wey dey devoted to education, women empowerment and gender equality, UN Women tok.

Source: www.bbc.com

About Us

Toolq Media Is a Global News Platform Covering the Latest Developments and Breaking Stories from Around The World, Including World News, Business, Finance, Technology, Health, Politics, Science, Entertainment, Sports, and More.

contact@toolq.dev
Toolq

Toolq @2026. All Rights Reserved.